SEO մասնագետների առջև հաճախ ծառանում է մի կարևոր հարց․ ինչպե՞ս ստեղծել բովանդակություն, որը կծառայի և՛ Google-ին, և՛ օգտատերերին: Սա հատկապես կարևոր է նորեկների համար, ովքեր դեռ փնտրում են ճիշտ հավասարակշռությունը: Միևնույն ժամանակ, նույնիսկ փորձառու մասնագետները երբեմն սխալվում են՝ ստեղծելով չափազանց երկար և թեմայից շեղվող բովանդակություն:
Google-ի ներկայացուցիչ Ջոն Մյուլլերին ուղղվել է հետևյալ հարցը.
«Արդյո՞ք գոյություն ունի բովանդակության իդեալական երկարություն Google որոնման արդյունքների համար: Ո՞րն է նախընտրելի՝ երկար, խորը վերլուծություննե՞րը, թե՞ հակիրճ, բայց արժեքավոր բովանդակությունը»:
Մյուլլերի պատասխանը հստակ է․
«Իդեալական երկարություն գոյություն չունի: Կարևորը համացանցին եզակի արժեք տրամադրելն է, ոչ թե պարզապես բառերի քանակն ավելացնելը»:
Իմ կողմից նշեմ․ «Եզակի արժեքը» կարող է արտահայտվել տարբեր ձևերով՝ պատկերներ, գրաֆիկներ, քայլ առ քայլ ուղեցույցներ: Սակայն դրանք արդյունավետ են միայն այն դեպքում, երբ համապատասխանում են օգտատիրոջ պահանջներին:
Քննարկման մասնակիցներից մեկը նշել է մի կարևոր խնդիր․ նույնիսկ բարձրորակ բովանդակությամբ կայքերը կարող են զիջել իրենց դիրքերը Reddit-ի նման հարթակներին՝ Google-ի «նախապատվությունների» պատճառով: Մեկ այլ մասնակից բարձրաձայնել է, որ «եզակի արժեքի» հասկացությունը բավականին անորոշ է, իսկ խոշոր մեդիա ռեսուրսների հետ մրցակցությունը՝ գրեթե անհնար:
Մյուլլերի պատասխանն այս մտահոգություններին ավելի քան դասական է․
«Մեխանիկական բաղադրատոմսեր չկան: Մտածեք հաջողակ բիզնեսների մասին․ նրանք կենտրոնանո՞ւմ են թվերի վրա, թե՞ առաջնահերթությունը տալիս են իրենց ապրանքների և ծառայությունների որակին»:
Այս մոտեցումը ենթադրում է, որ «եզակի արժեք» ստեղծելու համար անհրաժեշտ է կենտրոնանալ ոչ թե Google-ի, այլ իրական այցելուների պահանջների վրա:
Թեև վերջերս որոնման մարքեթինգի ոլորտում առաջարկվել է յոթ կետանոց ուղեցույց բովանդակության բարելավման համար, հրատարակիչները և SEO մասնագետները առավել մեծ հաջողության կհասնեն՝ հետևելով Մյուլլերի խորհրդին․ մոտեցեք առցանց բովանդակության ստեղծմանը այնպես, ինչպես կմոտենայիք իրական հաճախորդների սպասարկմանը:
